இந்த அதிகாரிகளுக்கு ஆகஸ்ட் மாத சம்பளம் கிடைக்காது என முதல்வர் யோகி கண்டிப்பான உத்தரவு பிறப்பித்துள்ளார். ஏன் தெரியுமா

ஆகஸ்ட் 31ம் தேதிக்குள் அசையும் மற்றும் அசையா சொத்துக்கள் குறித்த விவரங்களை வழங்காத அனைத்து அதிகாரிகள் மற்றும் ஊழியர்களின் ஆகஸ்ட் மாத சம்பளத்தை நிறுத்த முதல்வர் யோகி ஆதித்யநாத் அரசு முடிவு செய்துள்ளது.

இதுதொடர்பாக அனைத்து கூடுதல் தலைமைச் செயலாளர்கள், முதன்மைச் செயலாளர்கள் மற்றும் துறைத் தலைவர்களுக்கு தலைமைச் செயலாளர் மனோஜ் சிங் கடிதம் எழுதியுள்ளார். ஆகஸ்ட் 31-ஆம் தேதிக்குள் சொத்து விவரங்களைத் தருபவர்களுக்கு மட்டுமே சம்பளம் வழங்கப்படும் என்று செவ்வாய்க்கிழமை பிறப்பிக்கப்பட்ட உத்தரவில் கூறப்பட்டுள்ளது.

பல ஐஏஎஸ், ஐபிஎஸ், பிபிஎஸ், பிசிஎஸ் அதிகாரிகள் மற்றும் ஊழியர்கள் இன்னும் தங்கள் சொத்துகளை அறிவிக்கவில்லை. காலக்கெடுவை அமல்படுத்த யோகி ஆதித்யநாத் அரசின் இந்த கண்டிப்பான உத்தரவு, அதிகாரத்துவ வட்டாரங்கள் மத்தியில் பரபரப்பை ஏற்படுத்தியுள்ளது.

உத்தரபிரதேச அரசு அனைத்து அதிகாரிகளும் ஊழியர்களும் அசையும் மற்றும் அசையா சொத்துகளின் விவரங்களை ஆன்லைனில் வழங்குவதை கட்டாயமாக்கியுள்ளது. இதற்கான உத்தரவை பணியாளர் துறை பிறப்பித்துள்ளது. இந்த உத்தரவின்படி, விவரங்களை அளிக்காதவர்களுக்கு பதவி உயர்வு வழங்கப்படாது. முதல் உத்தரவில் ஜூன் 30ம் தேதி என காலக்கெடு நிர்ணயிக்கப்பட்டது.இதையடுத்து ஆகஸ்ட் 31ம் தேதி வரை நீட்டிக்கப்பட்டது.

இருப்பினும், மானவ் சம்பதா போர்ட்டலின் சமீபத்திய தகவலின்படி, உத்தரபிரதேச அரசாங்கத்தில் 26 சதவீத அதிகாரிகள் மற்றும் பணியாளர்கள் மட்டுமே இதுவரை தங்கள் சொத்து பற்றிய தகவல்களை வழங்கியுள்ளனர்.

மானவ் சம்பதா போர்ட்டலை ஆய்வு செய்ததில், தெளிவான உத்தரவுகள் இருந்தும், அதிகாரிகள் மற்றும் ஊழியர்கள் தங்கள் சொத்துக்கள் குறித்த தகவல்களை தெரிவிக்கவில்லை என்பது தெளிவாகியுள்ளது என்று தலைமைச் செயலாளர் தனது உத்தரவில் குறிப்பிட்டுள்ளார். ஊழியர்கள் 2023 ஆம் ஆண்டு வரை தங்கள் விவரங்களை அளித்துள்ளதாகவும், அதேசமயம் டிசம்பர் 31, 2024 வரை சொத்து விவரங்களை வழங்க வேண்டும் என்றும் உத்தரவில் கூறப்பட்டுள்ளது.

இந்த உத்தரவை தலைமைச் செயலர் பிறப்பித்துள்ளதாகவும், அனைத்து கூடுதல் தலைமைச் செயலர்கள், முதன்மைச் செயலர்கள், செயலர்கள், துறைத் தலைவர்கள், அலுவலகத் தலைவர்களுக்கு அனுப்பி வைக்கப்பட்டுள்ளதாக பணியாளர் துறை முதன்மைச் செயலர் எம்.தேவ்ராஜ் தெரிவித்துள்ளார்.

உத்தரபிரதேசத்தில் சுமார் 18 லட்சம் அரசு ஊழியர்கள் உள்ளனர் அவர்களில் 26 சதவீதம் பேர் மட்டுமே தங்கள் சொத்து விவரங்களை ஆன்லைனில் வழங்கியுள்ளனர். மானவ் சம்பதா போர்டலில் சொத்து விவரங்களை வழங்கும் முறை முதன்முறையாக உருவாக்கப்பட்டுள்ளதால், ஆகஸ்ட் 31ஆம் தேதி கடைசி நாள் என அரசு வட்டாரங்கள் தெரிவித்துள்ளன.